එංගලන්තය සමඟ පැවැති තරගයේ විශිෂ්ට පන්දු යැවීමක නිරත වෙමින් තරගයේ වීරයා වූ ලසිත් මාලිංග ඒ තරගය අවසානයේ ප්‍රකාශ කළේ අප තවත් උනන්දුවෙන් ක්‍රීඩා කළහොත් අවසන් වටයට යා හැකි බවයි. නමුත් ඊට පසු හමුවූ දකුණු අප්‍රිකාව සමඟ තරගය පරාජය වීමත් සමඟම ශ්‍රී ලංකා කණ්ඩායමට අවසන් හතර දෙනා අතරට පිවිසීමේ බලාපොරොත්තු අතහැර දැමීමට සිදු විය. මේ සිදුවීම් මෙසේ පෙළ ගැසෙන විට මාලිංග ප්‍රකාශ කළේ මේ වන විට තම ක්‍රිකට් දිවියේ අවසන් තරග කිහිපයට මුහුණ දෙමින් සිටින බවයි.
මේ ක්‍රිකට් ලෝක කුසලානයෙන් පසු ශ්‍රී ලංකා ක්‍රීඩා ලෝලයින් ඉදිරියේ තරගයක් ක්‍රීඩා කරන්න ඕනෑ. මීළඟ විස්සයි 20 ලෝක කුසලාන තරගාවලියට ශ්‍රී ලංකා කණ්ඩායම නියෝජනය කිරීමට බලාපොරොත්තු වන බව පවසන මාලිංග, මෙවර තරගාවලියෙන් පසුව බලධාරීන් සමඟ සාකච්ඡා කර තීරණයක් ගන්නා බව ද පවසයි.
මම සටන් කළා, මටත් දැන් මහන්සියි. 2020 ඔස්ට්‍රේලියාවේ පැවැත්වෙන විස්සයි 20 ලෝක කුසලාන තරගාවලියට ක්‍රීඩා කරන්න බලාපොරොත්තු වෙනවා. මම ඒ තරගාවලියට ක්‍රීඩා කරන්න කලින් මගේ දැක්ම ඒ අයට පැහැදිලි කරලා දෙනවා. ශ්‍රී ලංකා ක්‍රිකට් දැක්ම සහ මගේ දැක්ම ගැළපුණොත් මම ඒ දක්වා ක්‍රීඩා කරයි. එහෙම වුණේ නැත්නම් මම අන්තර්ජාතික පිටියෙන් සමු ගන්නා තීරණය ඉක්මන් වේවි.
සිය අනාගත බලාපොරොත්තු ගැන සඳහන් කරන මාලිංග අවුරුදු 10 ක් මායි නුවන් කුලසේකරයි එකට ක්‍රීඩා කළා. මම කැමැතියි එක තරගයක් නුවන් එක්ක ක්‍රීඩා කරලා තරග බිමෙන් සමු ගන්න. මම හිතනවා මගේ බලාපොරොත්තුව ඉෂ්ට වෙයි කියලා.
මගේ වයස අවුරුදු 36 යි. තරගයක මට තියෙන දේවලින් උපරිමය කළාට, තරගයක ප්‍රතිවාදීන් පරාජය කරන්න තරම් ශක්තියක් නෑ. දැන් අපි ශ්‍රේණිගත කිරීම්වල 9 වැනි තැන ඉන්නේ. මගේ අවසන් කාලයේ හත්වැනි තැන දක්වා හරි ඉදිරියට කණ්ඩායම ගේන්න පුළුවන් නම් සතුටු වෙනවා.
ශ්‍රී ලංකා කණ්ඩායමේ කඩා වැටීම පිළිබඳ අදහස් දක්වන මාලිංග, අපි මෙච්චර පහළට වැටිලා හිටපු කණ්ඩායමක් නෙවෙයි. ශ්‍රේණිගත කිරීම්වල 2 – 3 – 4 වැනි ස්ථානවල අපි හුඟක් වෙලාවට හිටියා. ඒ ගැන දුකයි.
Copied
Leave a Reply